東網電視
更多新聞短片
沙比阿朗素係高普完美接班人。(Getty Images)
高普宣布季尾同教練團離開利物浦，唔少利迷都話世界末日，不過地球仍然轉動，唔少分析認為，如果前利物浦名將沙比阿朗素肯回巢執教，咁就完美。
各大博彩公司為利物浦下任主帥人選開出盤口，頂頭大熱就係利華古遜主帥沙比阿朗素，賠率1賠1，排第2係白禮頓領隊迪薩比，賠率2賠7，第3係高普助手連達斯，賠率1賠8，往後人選分別係拿高斯文、謝拉特、安歷基、施蒙尼等，但都係冷門。
話沙比阿朗素眾望所歸，確實冇錯，佢係利物浦2005年歐聯奪冠功臣之一，生涯仲踢過皇馬同拜仁等豪門，國家隊方面又捧過世盃同歐國盃，球員時代贏盡所有嘅佢，初執教鞭已經展露才華，利華古遜今季仍然係五大聯賽唯一不敗之師，好有機會打破拜仁壟斷捧走德甲。
一旦協助利華古遜打破二奶命奪冠，沙比阿朗素喺德甲就功德圓滿，執教拜仁對佢再無吸引力，雖然皇馬視佢為安察洛堤指定接班人，但安帥仲生勾勾喺度，反而利物浦今夏就有職位空缺，而且高普已經幫球隊完成換血，對沙比仔嚟講，最佳選擇當然係返紅軍執教。
