東網電視
更多新聞短片
美斯抵達東京。(國際邁亞密官網)
鬧出回水風波嘅國際邁亞密周一(5日)取消在港行程，下午乘專機離港，晚上飛抵日本東京，球隊官網發布球員到埗情況，阿根廷球王美斯同幾日前抵達香港一樣，自攜行李手持飲品出艙，不過落樓梯時面露微笑，唔似得喺香港咁木口木面。
據報道，國際邁亞密原本今日獲安排參觀啟德體育園區，但已告取消，球隊下午2時離開酒店，乘專巴約3時抵達香港國際機場離港，直至晚上抵達日本東京，展開日本之旅。
美斯在港期間表情嚴肅，甚少露出笑容，但抵達東京嘅官方照片所見，落樓梯時面露微笑，看來未有受香港回水風波事件影響心情，而且對待日本集訓似乎有唔同態度。
國際邁亞密將於周三(7日)表演賽對日職冠軍神戶勝利船，賽會特別邀請曾先後效力巴塞及勝利船巨星恩尼斯達到日本客串，與美斯及一班前巴塞隊友在東京聚舊，「小白」係美斯「地上最強」同期隊友，令今場表演賽別具意義，可能亦係美斯面露笑容嘅原因。
有網友見到美斯去到東京咁開心，就提出「魚蛋論」，希望美斯去到東京要繼續受傷，千祈唔好上陣，否則香港同中國球迷就會好難受。
