曼聯公布今夏美國之旅　將鬥利物浦阿仙奴

曼聯正式公布，將於今夏再次前往美國進行季前熱身賽，對手包括2支英超宿敵利物浦、阿仙奴，戲碼強勁，相信又可以大賺一筆。

曼聯上年夏天去美國踢咗4場熱身賽，總共吸引超過23萬人次入場睇波，創造龐大經濟效益。會方再接再厲，計劃今夏再次舉行美國之旅，加上利物浦、阿仙奴亦會去當地集訓，英超三雄可以趁機交鋒「吸金」。據悉曼聯將於7月27日喺洛杉磯對阿仙奴，然後8月3日喺南卡羅萊納大學對利物浦。

值得一提，曼聯同利物浦曾於2018年喺美國密歇根球場交手，當時有10萬人入場觀戰，預料今夏「雙紅會」將再次喺美國掀起熱潮。