「拉爵」欽點！曼聯搵巴克里代卡斯米路

曼聯新老闆拉特克利夫上場後，講到明要改革買人政策，卡斯米路、華拉尼、安東尼馬菲奧斯呢類性價比極低嘅球員可免則免。據英國《太陽報》獨家消息，「拉爵」已欽點收購盧頓中場巴克里，希望下季搵佢取代卡斯米路嘅位置。

現年30歲嘅巴克里，今季喺盧頓重生，今季英超已有3入波+3助攻，係盧頓中場攻守靈魂人物，傳聞更有可能重新入選英格蘭國家隊。報道指曼聯2大巨星拉特克利夫同巴斯福特，都非常鍾意巴克里，「拉爵」2年前就曾經為佢旗下法甲球會尼斯簽入巴克里，夏天準備再次收購。

巴克里絕對係「平靚正」人選，消息指如果盧頓降班，呢位英格蘭中場將可以自由轉會，就算盧頓護級成功，巴克里合約內亦有平價收購條款。曼聯中場夏天將會改組，卡斯米路同基斯甸艾歷臣將被放棄，借用嘅蘇夫恩岩拉伯特亦好大機會被退回，簽巴克里係明智之選。