迪布尼計劃同曼城續約　35歲離隊

奇雲迪布尼同曼城合約仲有1年到期，雙方續約問題不大，報道指32歲嘅迪布尼打算在35歲掛靴，或轉戰美職，換言之佢仲會喺曼城踢多3季。

《The Athletic》報道，迪布尼同曼城嘅續約談判仍未展開，曼城對於年過30球員續約策略傾向保守，只會續1至2年短約，馬列斯同根度簡因此相繼離隊，但對迪布尼影響不大，因為無論合約長短，呢位比利時國腳都打算35歲離隊。

去年夏天，迪布尼收到來自沙特希拉爾報價，年薪7,000萬歐元(約5.9億港元)，被迪布尼拒絕，不過希拉爾體育總監埃梅納洛，正是當年協助車路士由亨克簽入迪布尼嘅重要人物，可以話係迪布尼嘅伯樂，因此時至今日，雙方仍保持聯繫。

不過據報道，迪布尼同家人對於前赴中東生活興趣不大，佢本人屬意為曼城再踢3季就離開，之後視乎身體狀況，如果到時仲踢得，就會考慮到美職比賽，在賽場上做更多貢獻。