東網電視
更多新聞短片
查洛保雲首次連中三元。(Getty Images)
周二(27日)凌晨英超，今年狀態低迷嘅韋斯咸踢出翻身仗，憑住查洛保雲職業生涯首次連中三元，「錘仔幫」主場4比2大破賓福特拎到2024年第1勝，聯賽榜升上第8位，重燃爭奪歐洲賽資格嘅希望。
韋斯咸踏入2024年後各項賽事8場不勝，領隊莫耶斯亦被傳帥位不穩，不過今場成功反彈，查洛保雲喺開波7分鐘內連轟2球，馬奧比13分鐘為賓福特追番1粒；弗爆嘅查洛保雲63分鐘完成「帽子戲法」，加上艾馬臣柏美尼轟入世界波，幫韋斯咸贏到4比1，客隊尾段由韋沙再追1球冇咁肉酸，但難阻韋斯咸4比2贏波。
查洛保雲職業生涯15次梅開二度後，今場終於首嘗連中三元滋味，依家英超射手榜入14球排第3位，僅次於艾寧夏蘭特(17球)同穆罕默德沙拿(15球)。莫耶斯賽後表示：「我為保雲開心，球隊之前狀態差，佢嘅表現就受到忽視，但保雲踢法全面兼有好高效率，希望今場嘅入球會令修夫基(英格蘭領隊)再次注意到佢。」
