東網電視
更多新聞短片
菲爾科頓今季已入18球。(Getty Images)
曼城中場菲爾科頓近期大爆發，上場「曼市打吡」入2球光芒四射，呢位23歲英格蘭國腳近日入波後經常做出「射槍」慶祝動作，原來係因為佢嘅射術提升後，獲隊友冠以「狙擊手」嘅綽號，領隊哥迪奧拿更拎佢同「球王」美斯相比！
菲爾科頓今季獲哥迪奧拿解放，喺前場獲安排出任一個自由位置，參與進攻機會大增，佢亦以18個入波同11次助攻數據回報，哥帥表示：「好球員唔單止自己踢得好，仲要幫球隊贏波，我遇過最偉大嘅球員美斯就做到。我唔係比較佢哋兩個，菲爾科頓水平未到美斯，但佢已經幫球隊贏波。」
據報菲爾科頓今季苦練射術，每日加操1個鐘頭練射門，基爾獲加透露：「菲爾科頓好鐘意射門，當佢校順隻左腳，佢可以好冷靜同好高質咁完成射門，我哋都會叫佢做『狙擊手』。」菲爾科頓近期經常出現嘅慶祝動作，就係回應隊友畀嘅稱號。
