森林為扣分提出上訴　但面臨更差結果

英超球會諾定咸森林上星期被判違反「盈利及可持續發展條例」，被英超賽會罰扣4分，加深降班危機，會方依家正式宣布提出上訴，但其實係一場「賭博」，英國傳媒指森林一旦上訴失敗，將會被加刑，扣減更多分數。

諾定咸森林會方發表聲明，認為裁決唔公平，已確定提出上訴，有結果之前，唔會再就扣分事件作出評論。森林上年承認財務比英超定出嘅負債上限超過3,450萬鎊，不過會方要求酌情處理，因為原本可以喺財政年度內，以3,000萬鎊賣比蘭莊臣去賓福特，但因為希望以更高價錢賣出，最終9月份以4,750萬鎊賣去熱刺，但仲裁小組未有接納呢個解釋，決定判森林扣減聯賽4分。

諾定咸森林被罰扣4分後，跌落第18位「降班區」，落後尾四盧頓1分，如果上訴成功，可以重返護級線之上。不過，英國《太陽報》指森林提出上訴非常冒險，一旦被駁回，將面臨加刑，扣減更多分數，到時想翻身就更加難。