沙拿接班人係佢　利物浦加碼搶購洛迪高高斯

由於利物浦前鋒穆罕默德沙拿可能今夏離隊，去沙特阿拉伯「掘金」，紅軍正在積極物色接替人選，根據西班牙《民族報》爆料，利物浦第2次向皇馬提出收購射手洛迪高高斯，今次開價8,000萬歐元(約6.8億港元)，但估計「銀河艦隊」起碼要1億歐元(約8.4億港元)先至會放人。

據悉利物浦曾經開出6,000萬歐元(約5.1億港元)收購洛迪高高斯，但被皇馬拒絕，今次加碼至8,000萬歐元，可以話係志在必得。不過，呢位23歲巴西國腳仲有4年合約在身，「銀河艦隊」可以吊高來賣，若然轉會費少於1億歐元，都唔會出售洛迪高高斯。

洛迪高高斯2019年由山度士加盟皇馬，今季各項賽事上陣41場射入13球8次助攻，屬於球隊主力。不過，盛傳如果皇馬簽入法國射手基利安麥巴比，就可能會出售洛迪高高斯，所以利物浦能否簽入呢位猛將，好大程度上要睇麥巴比去向。