拜仁贏波得不償失　高文受傷提早收咧

周六(13日)晚德甲賽事，拜仁慕尼黑主場2比0擊敗科隆，暫時拖延利華古遜嘅奪冠時間(利華古遜周日出賽)。不過拜仁今場得不償失，法國翼鋒京士利高文勇戰受傷，將缺陣周中歐聯8強次回合對阿仙奴嘅賽事，據報佢今季更會提早收咧。

拜仁今仗半力出擊，之前因膝傷缺陣2個月嘅京士利高文復任正選，但佢喺下半場早段冇碰撞下自己拉傷右腳肌肉，被逼提早退下火線。拜仁65分鐘由拉菲爾古里路打破僵局，湯馬士梅拿喺補時3分鐘鎖定勝局，協助拜仁贏2比0。

拜仁賽後發聲明，證實京士利高文將要休息「數個星期」，德國媒體指呢位法國國腳將提早收咧，但可以趕及夏天嘅歐國盃決賽周。拜仁教練杜曹賽後表示：「高文嘅傷令人心痛，我見佢好痛苦，周中肯定唔踢得，歐聯8強需要充足人腳，比賽隨時要踢120分鐘，對拜仁嚟講呢個係重大打擊。」