【有片】施卡馬卡超級掛射　阿特蘭大入意盃決賽

周四(25日)凌晨意盃4強次回合，阿特蘭大主場4比1大破費倫天拿，兩回合合計贏4比2殺入決賽，將會同祖雲達斯爭奪冠軍。意大利前鋒施卡馬卡今仗又做英雄，佢嘅精彩掛射係今季個人第15球，擺脫「英超水貨」污名。

阿特蘭大首回合輸0比1，今仗返主場踢得積極，8分鐘由古普美拿斯開紀錄，但68分鐘被費倫天拿入波，總比數再次落後。75分鐘施卡馬卡盡顯功架，接應隊友頭槌二傳，施展掛射直轟入網。阿特蘭大愈戰愈勇，完場前再由盧卡文同柏沙歷建功大勝晉級。

施卡馬卡掛射入波片段：https://twitter.com/i/status/1783233480182173771　

施卡馬卡喺薩斯索羅上位，上季轉投英超韋斯咸表現差勁，1季就被踢返意甲，不過今季演出精彩，早前喺歐霸盃8強入2球射爆利物浦，最近9場比賽入7球。當選今場MVP嘅施卡馬卡賽後表示：「好開心個入波幫球隊晉級，係隊友幫助我入波，喺阿特蘭大我踢得好開心。決賽唔存在熱門，我哋會盡全力爭取捧盃。」

不過施卡馬卡可能唔記得，自己80分鐘食咗面黃牌，累積夠黃牌數目，決賽要停賽，要做觀眾睇住隊友爭盃。