巴塞睇中柏迪　一個條件最關鍵

阿仙奴中場湯馬士柏迪今季上陣機會唔多，合約尚餘1年，雙方唔打算續約，據報巴塞隆拿對呢位30歲加納國腳有興趣，不過有一個條件最關鍵，就係唔可以太貴。

西班牙記者Adrian Sanchez報道，巴塞正物色中場，湯馬士柏迪係目標之一，不過巴塞預算有限，只會以相對較低價錢簽入；至於「兵工廠」並不排斥出售柏迪，特別係佢傷病較多，會方正評估簽入皇家蘇斯達中場蘇比文迪代替佢。

湯馬士柏迪本人亦傾向離開阿仙奴尋求新挑戰，今年初就曾與祖雲達斯接觸，亦唔抗拒來自沙特阿拉伯嘅斟介，如果佢想簽一分高價合約，可能會拒絕巴塞而改赴中東發展。

湯馬士柏迪於馬體會青訓出身，效力馬體會6季後於2020年夏天被阿仙奴挖角，支付4,500萬鎊解約金，為阿仙奴4季上陣112場入5球，如果平價賣畀巴塞，阿仙奴有一定損失。