皇馬幸福煩惱　高圖爾斯搶踢歐聯決賽

距離歐聯決賽仲有3個星期，皇家馬德里就出現「幸福的煩惱」，隨住首席門將泰拔高圖爾斯傷愈復出，佢同今季表現出色嘅盧連邊個踢歐聯決賽，即成球迷熱烈討論話題，有傳教練安察洛堤傾向用泰拔高圖爾斯，不過名將卡斯拿斯就撐盧連繼擔正。

泰拔高圖爾斯係皇馬正選，但佢今季長期養傷期間，烏克蘭門神盧連就用表現贏得信任，歐聯8強2救12碼淘汰曼城更係代表作。泰拔高圖爾斯近期復出後，連續2場聯賽把關都保持不失，不過中間嘅歐聯4強次回合對拜仁就由盧連上陣，安察洛堤表示：「最後幾場聯賽，我會用嚟評估門將位置。」盧連亦表示：「個個球員都想踢歐聯決賽，教練冇向我保證任何嘢，而且距離決賽仲有一段時間。」

西班牙媒體《Relevo》報道，安察洛堤暫時傾向用泰拔高圖爾斯，當然要視乎佢喺未來幾場嘅狀態同表現，不過皇馬傳奇門將卡斯拿斯就話：「我認為盧連應該繼續正選，泰拔高圖爾斯唔需要證明自己，佢會再次成為世界最佳門將，問題係佢自己復出冇耐，而盧連已證明自己有能力喺大賽交出表現。」