香港隊　辭任主教練　安帥：收到冇得拒絕嘅邀請

莊恩安達臣周三（29日）聯同足總署任總幹事張炎有，於何文田足總總部會見記者，宣布正式辭任港足主教練一職，並提到將會轉教香港以外球會，惟卻未有提到新東家的名字。

近日有消息指安達臣離任港足主教練，他日前亦未有現身港隊操練，使傳聞甚囂塵上，安達臣是日在會上宣布離職，又提到足總曾向自己提供3年合約，但由於最近收到來自海外球會「不能拒絕」的邀請，最終決定尋求新發展：「足總為咗令我留隊，已經作出好大努力，所以我之前都為咗港隊，拒絕咗好多邀請。但最近收到個冇得拒絕嘅外地球會邀請，現階段我唔可以講下一站會去邊，好遺憾要做呢個決定，希望香港隊將來可以繼續攞到好成績。」

張炎有就提到足總此前一直跟安達臣商討續約，直至上星期已向他提出3年合約，強調所有條款已合乎安達臣提出的要求，可惜安達臣最終提出離隊：「當早幾日收到安達臣會離隊嘅消息之後，已經即刻同佢了解件事，佢都提到自己有意離任，直到今日正式提出請辭。」。「有哥」亦指將由助教盧斯爾（Wolfgang Luisser）暫代主教練，並以司徒文俊為助教，帶領港隊出戰6月兩場國際賽。他稱會按程序招聘新教練，又提及安達臣未有交代處理新入籍兵等後續安排。

日前在「香港足球明星選舉」頒獎典禮成為4料「足球先生」的陳肇鈞（Philip），就對「安帥」確定離職感到突然，但讚揚對方已令香港足球有所進步，祝福對方未來有更好發展：「足球世界千變萬化，冇得保證一個教練可以留喺同一支球隊好耐，而且安達臣已經令港足有好大進步，所以無論佢去到邊，我都會繼續支持佢。」Philip又盼望足總，能夠尋找合適人選當主教練，延續安達臣戰術理念，令港隊以正確方式前進。

在杭州亞運助港隊打入4強的潘沛軒，亦對安達臣離職感到不捨：「始終係佢（安達臣）揀我入『大港腳』，而且我哋喺亞洲盃、亞運同其他國際賽都有唔錯表現，所以好多謝佢帶畀香港足球新嘅景象，依家佢走咗真係好可惜。」談到接下來兩場世盃外的備戰工作，「潘沛」稱會努力遵從教練團部署，全力爭勝。

羅梓駿亦對「安帥」離職有感而發：「佢早排仲逐個打電話問我哋嘅身體狀況，全力準備嚟緊嘅世盃外，所以去到港隊開操前幾日，突然間收到風佢會走，覺得好突然。」另一名港隊主力葉鴻輝，就坦承安達臣此時離開，對港隊備戰6月兩場世盃外造成影響，但仍祝福對方未來一切安好：「見到網上都有消息，話佢（安達臣）嚟緊份聘約條件好唔錯，希望佢之後順順利利。」

安達臣於2021年上任港足主教練，期間帶領港隊先後打入亞洲盃決賽周，以及杭州亞運4強，贏得不少球迷認同。