東網電視
更多新聞短片

查洛保雲必入波被隊友扠喎。
英格蘭為歐國盃挑選33人進行集訓,決賽周前會有7個球員被踢走,各球員都想盡量爭取表現。周二(4日)凌晨熱身賽3比0贏波斯尼亞一仗,查洛保雲本來可以用首個國際賽入波為自己加分,但射門竟然被隊友安斯干沙龍門口扠喎,查洛保雲即場表現不滿,連球隊入波都冇心情慶祝。
查洛保雲今場以右翼身份踢足全場,完場前1分鐘本來有機會拎到代表英格蘭首個入波,佢接應占士麥迪臣傳送近門起腳,當個波睇住會入網之際,安斯干沙就企正喺龍門口「救空門」,查洛保雲即時嬲到抱頭埋怨,哈利卡尼輾轉下射成3比0,查洛保雲亦冇慶祝,繼續表現佢嘅不滿。
據報英格蘭7個被踢走球員當中,查洛爾昆沙、占士查福特同查洛保雲係3大熱門,而扠喎查洛保雲入波嘅安斯干沙亦可能冇得留低。查洛保雲喺卡塔爾世盃,亦係入圍初選名單後再被剔走。