比利時玩「讓賽」？維持25人出戰歐國盃

比利時國家隊主帥泰迪斯高表示，將會維持現有25位球員出戰今屆歐國盃，唔會再補選多1人，意味協助皇馬捧歐聯冠軍嘅門將泰拔高圖爾斯，肯定無緣呢項大賽。

今屆歐國盃每隊最多可以徵召26位球員，泰迪斯高早前只揀選25人，當中並冇泰拔高圖爾斯，最終亦冇改變主意，佢話：「我相信呢支球隊嘅實力，同埋我對25呢個數字特別有好感。」

外界一直以為泰迪斯高可能會補選泰拔高圖爾斯，因為呢位32歲鋼門養傷9個月，上月復出後有不俗表現，為皇馬5次上陣都保持不失球，並協助球隊捧歐聯冠軍。

不過，近幾個月，泰拔高圖爾斯同泰迪斯高曾多次隔空言語交鋒，前者表示並未獲得國家隊尊重，而泰迪斯高亦曾透露泰拔高圖爾斯唔會參加歐國盃，佢無緣入選，並唔令人意外。