老而彌堅！莫迪歷勢追平保方國際賽上陣紀錄

克羅地亞將於周日(16日)凌晨歐國盃B組對西班牙，已經為國家隊上陣175場嘅38歲隊長莫迪歷，如果今仗披甲，就可以追平意大利傳奇門將保方，成為史上國際賽上陣次數第3多嘅歐洲球員，甚至有機會趁今屆賽事，一舉超越前皇馬隊友沙治奧拉莫斯，升上第2位。

根據歐洲足協統計，國際賽史上最多上陣次數嘅歐洲球員前3位，分別係C朗(207次)、沙治奧拉莫斯(180次)、保方(176次)，莫迪歷以175次排第4位。克羅地亞起碼有3場分組賽踢，相信莫迪歷要超越保方，升上第3位，應該冇問題，如果克羅地亞打入4強，而莫迪歷悉數上陣，更加可以超前沙治奧拉莫斯，升上第2位。

另外，效力曼城嘅22歲克羅地亞後衞加華度爾話，莫迪歷在陣令其他隊友唔敢偷懶：「當我見到佢呢個年紀仍然為球隊奉獻一切，作為年輕球員一定要做得比佢更多，佢推動我哋班年輕球員，更上一層樓。」