無緣豪門　迪薩比將執教馬賽

迪薩比5月離隊白禮頓之後，曾經盛傳拜仁慕尼黑、車路士、曼聯計劃邀請呢位45歲意大利少帥執教，但隨住拜仁、車仔已聘請新帥，加上紅魔鬼留用坦哈格，迪薩比無緣擔任豪門主帥，根據「轉會權威」記者羅曼諾(Fabrizio Romano)爆料，迪薩比將轉戰法甲，做馬賽教練。

據悉迪薩比已經接受馬賽方面開出嘅個人待遇條款，如無意外，雙方將會簽約3年。迪薩比上月提早同白禮頓解約，獲得會方「開恩」，將解約金由原本1,500萬歐元(約1.26億港元)減至600萬歐元(約5,000萬港元)，所以馬賽會方需要支付600萬歐元解約金畀白禮頓，迪薩比先至可以正式加盟，預料馬賽會同意交錢「贖人」。

另外，今年2月被馬賽炒魷嘅教練加度素搵到新工作，成為克羅地亞球隊夏德嘅教練，雙方簽約至2026年。