拿達路做救世主　阿根廷絕殺智利出線

周三(26日)早上美洲國家盃A組，上屆冠軍阿根廷憑後備上陣嘅拿達路馬天尼斯扮演救世主，88分鐘射入全場唯一入球，以1比0擊敗智利，2戰2勝，提早取得8強席位。

阿根廷首仗以2比0小勝加拿大，今仗繼續由美斯同祖利安艾華利斯合組鋒線，但兩隊上半場有唔少時間陷入混戰，美斯喺24分鐘被對手踢中腿部，需要接受治療，幸好冇大礙，可以繼續比賽。

其後阿根廷攻勢開始入肉，尼高拉斯干沙利斯、祖利安艾華利斯先後射門都創造威脅，美斯更加有1次射門擦柱而出。

換邊之後，阿根廷仍然佔上風，可惜攻門總係失之交臂，包括尼高拉斯干沙利斯勁射中楣彈出。戰至73分鐘換入迪馬利亞、拿達路馬天尼斯加強攻力，果然立竿見影，美斯開出角球，引起門前混戰，最後由拿達路馬天尼斯射入，呢位國際米蘭前鋒連續2場有波入，狀態相當勇猛。

同組另1場，加拿大以1比0小勝秘魯，以3分排第2位，智利同秘魯只有1分，所以阿根廷提早1輪取得出線權。