紐卡素散貨　出售兩球員入帳6.7億

紐卡素要喺6月30日死線前出售球員，以符合財務條例，避過受罰，近日「喜鵲」連環出售兩名球員，包括中場安達臣，以及翼鋒明達，據報總共收回合共6,800萬鎊(約6.7億港元)。

先講安達臣，該21歲英格蘭中場上季為紐卡素上陣26場，交出2次助攻，是隊中主力。英國傳媒報道，安達臣本人原本唔想離隊，但買家諾定咸森林開出條件極度吸引，結果答應轉會，出售安達臣令紐卡素收取高達3,500萬鎊轉會費。

至於岡比亞19歲翼鋒明達，去年由奧丹斯轉投紐卡素轉會費為580萬鎊，並立即外借予飛燕諾，上季上陣37場入11球，表現出色，不過紐卡素於日前將佢出售予白禮頓，轉會費係破「海鷗」紀錄嘅3,300萬鎊。

紐卡素順利散貨之後，財務違規情況解除，並立即從諾定咸森林買入30歲門將華卓迪莫斯，該球員身價僅為700萬歐元。