等食花生！英超球證主吹2場8強大戰

英超球證執法水平近年飽受質疑，不過歐洲足協仍然當佢哋係寶，日前宣布歐國盃8強兩場重頭戲，分別由安東尼泰萊同奧利華兩位英超「名哨」執法，佢哋今屆都曾經作出爭議性判決，歐國盃8強激戰必定更多「花生位」。

德國對西班牙嘅大戰，會由安東尼泰萊同佢嘅英格蘭團隊執法，包括VAR球證艾治維。安東尼泰萊喺荷蘭同法國嘅分組賽入面，將沙維西蒙斯嘅入波判作廢，賽事被荷蘭領隊朗奴高文炮轟。歐洲足協球證委員會主席魯錫迪事後讚安東尼泰萊判斷正確，但指用5分鐘時間去覆核就搞得太耐。

另一英超判官奧利華，就獲安排吹葡萄牙對法國，佢喺16強執法德國對丹麥，爭議性判丹麥中堅佐基姆安達臣禁區內手球罰12碼，賽後同樣被丹麥將帥抨擊，佐基姆安達臣當時表示：「我冇權向奧利華投訴，因為會食黃牌，奧利華可以犯晒所有嘅錯，但我唔容許講任何嘅嘢。」