東網電視
更多新聞短片
祖奧菲歷斯今場射失12碼。(Getty Images)
葡萄牙喺歐國盃8強互射12碼不敵法國，祖奧菲歷斯成為全場唯一射失12碼球員，並且成為自1998年意大利中場迪比亞治奧之後，近26年首位國際大賽對法國，12碼宴客嘅球員。
祖奧菲歷斯出道後被譽為「新C朗」，但近年表現平平無奇，甚至因為同馬體會教練施蒙尼不和，淪為「人球」近2季先後被外借去車路士同巴塞隆拿。呢位24歲前鋒踢國家隊都係冇料到，今屆歐國盃僅上陣2次，其中對格魯吉亞，全因球隊已提早取得出線權，先至可以擔正，今場8強，佢等得加時先至後備上陣。
領隊馬天尼斯原本以為祖奧菲歷斯有氣有力，安排佢主射12碼，但卻射中柱彈出孭晒鑊，換言之，祖奧菲歷斯今屆2次上陣，葡萄牙都輸波，變成「黑腳」。
由於馬體會無意收回祖奧菲歷斯，巴塞因財困，難以買斷佢，有傳葡超勁旅賓菲加計劃以3,000萬歐元(約2.5億港元)買入祖奧菲歷斯一半擁有權，幫佢下季回歸母會。
