科木做大事！連簽3老將征戰意甲

新一季將會征戰意甲嘅科木，喺法比加斯帶領下雄心壯志，據報已經同3位星級老將達成轉會協議，艾拔圖摩蘭奴、連拿同華拉尼將會齊齊加盟。

科木喺老闆之一嘅法比加斯帶領下，成功升上意甲，法比加斯即用佢嘅人脈為球隊招兵，先打西班牙同鄉兼舊隊友主意，權威記者Fabrizio Romano報道，夏天約滿維拉利爾嘅左閘艾拔圖摩蘭奴同門將連拿，已經同科木達成協議，將以自由身簽約1年，其中42歲嘅連拿之前效力過拿玻里、AC米蘭同拉素，對意甲絕不陌生。

兩位前西班牙國腳加盟後，法國中堅華拉尼亦接近同科木簽約2年。科木早前已簽入前意大利國腳前鋒比洛迪，令陣容星味十足。西班牙名將法比加斯目前未有歐洲足協職業教練牌，暫時「掛名」做助教，其實佢先係球隊真正話事人。