【官宣】曼城「最抵價」簽巴西翼鋒沙維奧

英超冠軍曼城周五(19日)宣布今夏第1簽，巴西翼鋒沙維奧由「衞星球會」特魯瓦加盟，呢位20歲新星貴為巴西新晉國腳，曼城只係用2,100萬鎊就簽到，真係「抵到爛」。

沙維奧有份入選巴西美洲盃大軍，佢上季由法乙特魯瓦外借西甲基羅納，交出11個入波同10次助攻數據，表現出色。特魯瓦同基羅納都屬於城市足球集團，被視為曼城「衞星球會」，今次轉會亦被視為「內部提升」。

據報曼城收購沙維奧，只需支付2,100萬鎊轉會費，另外再有約1,100萬鎊浮動獎金條款，佢簽約5年後表示：「我今日嚟到曼城，第1時間同經理人講，我冇可能會拒絕曼城斟介！曼城係世界最佳球會，哥迪奧拿係最偉大領隊之一，作為巴西球員，我鍾意踢主動足球，用入波同助攻幫助球隊，能夠令觀眾興奮到企起身係我最鍾意嘅事。」

沙維奧預計會主要出任右翼，佢會着26號波衫，曼城上一個着26號嘅球員係馬列斯。