利物浦擊敗貝迪斯 施洛透露未必會增兵
2024年07月27日 11:02
東網電視
更多新聞短片
![](/hk/bkn/cnt/sport/20240727/photo/bkn-20240727110245066-0727_00882_001_01p.jpg?20240727113738)
蘇保斯拉爾(左)射入全場唯一入球。
周六(27日)早上,利物浦「美國之旅」熱身賽第一擊旗開得勝,憑蘇保斯拉爾入波,以1比0擊敗貝迪斯,穆罕默德沙拿貢獻助攻,現有人腳表現不俗,難怪新領隊施洛透露,今夏未必需要增兵。
雖然利物浦今仗缺少阿歷山大阿諾特、華基爾雲迪積克、加普、達雲紐尼斯、路易斯迪亞斯等國腳,但仍然有蘇保斯拉爾、穆罕默德沙拿、遠藤航、哈維艾利洛等常規球員。紅軍表現稍佔上風,開賽4分鐘,法比奧卡華路勁射唔中目標,貝迪斯亦有費基亞喺禁區內起腳射高。
戰至34分鐘,穆罕默德沙拿右路突破之後,妙傳畀蘇保斯拉爾射入打開紀錄。雙方之後互有攻守,但始終未能再出現入球,利物浦贏1比0之後,將於8月1日早上對阿仙奴,3日之後對曼聯。
利物浦今夏仍未簽入新球員,主帥施洛表示,需要先了解現有人腳,再評估是否需要增兵:「我要先評估現時人腳,但依家非常困難,因為唔少主力仍然未歸隊,我接手一支非常優秀球隊,要簽入同樣水平,甚至更高水平球員,並唔容易,如果話我哋今夏唔增兵,外界可能感到驚訝,但的確有可能發生,總之只會簽合適嘅球員。」
日本傳媒早前指利物浦計劃收購皇家蘇斯達進攻主將久保建英,但會方其後否認,根據英國《鏡報》爆料,紅軍真正目標係韋斯咸翼鋒古達斯,皆因呢位即將24歲嘅加納國腳位置及踢法比較接近沙拿,可以作為佢嘅接班人。