拿度頂着傷患苦戰3盤晉級　次圈鬥祖高域

巴黎奧運開幕禮做火炬手嘅「泥地王」拿度，最終如期出戰男單首圈賽事，同匈牙利富索域斯苦戰3盤，最終贏2比1晉級，次圈會同老對手祖高域夢幻對決。

拿度本來諗住放棄男單，專攻男雙，希望可以攞男雙獎牌，但最終佢都冇棄賽，首盤頭威頭勢先贏6比1，以為好快搞掂，但第2盤互相破發下，富索域斯追番盤6比4，追和1比1。

第3盤拿度受傷患影響，打到第5局先至成功破發，最終把握第3個決勝分贏6比4，總計贏2比1晉級。對於喺奧運賽場再鬥祖高域，拿度表示祖高域仍然保持高水平，但自己近年競爭力已大不如前，所以祖高域先係賽事熱門。

另邊廂梅萊喺男雙拍住伊雲斯出戰男雙，以2比6、7比6(7比5)、11比9反勝錦織圭及丹尼爾太郎2比1，晉級次圈。