舒克斯識撈　稱曾勸穆斯亞拿加盟曼聯

曼聯新簽前鋒約舒亞舒克斯早前已經抵達曼市卡寧頓訓練基地操練，呢位23歲荷蘭國腳被球迷問到，會唔會幫手做「說客」，協助紅魔鬼簽入佢嘅前拜仁慕尼黑隊友穆斯亞拿，舒克斯話：「我已經試過。」

約舒亞舒克斯落車為球迷簽名，對方立即提問：「你幫幫手，叫埋穆斯亞拿加盟曼聯。」舒克斯答：「我已經試過。」講到言之鑿鑿。

約舒亞舒克斯曾於拜仁慕尼黑青年軍受訓，並為一隊上陣過17場入4球，同穆斯亞拿做過隊友，直至2年前正式離開拜仁，轉投博洛尼亞。

兩人仍然有聯絡，加上穆斯亞拿喺今屆歐國盃表現出色，曼聯球迷都希望會方簽埋呢位21歲德國國腳，同約舒亞舒克斯拍住上。不過，穆斯亞拿貴為拜仁絕對主力，屬於非賣品，難怪約舒亞舒克斯「功虧一簣」。