韋斯咸買人4連擊　夏天狂燒1.3億鎊

英超球隊韋斯咸今個夏天大展拳腳，西班牙名帥盧比迪古上任後積極買人，據報短期內將獲4位強援加盟，荷蘭翼鋒森馬維爾周日(4日)率先以3,400萬鎊轉會費由列斯聯加盟，而富克洛、古度費南迪斯同雲比沙卡亦非常接近加盟，韋斯咸夏季買人花費將突破1.3億鎊。

22歲嘅森馬維爾同韋斯咸簽約5年，佢上季為列斯聯喺各項賽事入21球，轉會費為2,500萬鎊，再加900萬鎊獎金條款。除此之外，韋斯咸亦傾掂2,700萬鎊收購多蒙特前鋒富克洛，呢位德國國腳已離開多蒙特集訓營，飛去倫敦做體測；至於阿根廷國腳中場古度洛迪古斯同樣喺倫敦做緊體測，佢同貝迪斯約滿後可以自由身加盟。

另外，韋斯咸正同曼聯就收購雲比沙卡嘅細節談判，呢位英格蘭右閘已同意個人條款，韋斯咸有望以1,500萬鎊轉會費達成交易。連同較早前簽入麥斯基爾文、古靴美等球員，韋斯咸夏天買人花費會突破1.3億鎊大關。