奧拿拿再玩12碼「讓你射」　成功率100%！

曼聯周六(10日)喺社區盾大戰曼城，最終互射12碼落敗無緣錦標，不過門將奧拿拿就成功「搶Fo」，佢喺12碼階段再次大玩心理戰，面對艾寧夏蘭特嗰陣企大細邊，伸手向大位示意「讓你射」，最終艾寧夏蘭特順利射入。連同季前熱身賽，奧拿拿3次喺射12碼施展「讓你射」招數，100%成功讓對手射入，講得出做得到！

12碼大戰階段，奧拿拿率先撲出貝拿度施華嘅12碼，去到第3輪嗰陣，奧拿拿突然企向自己右邊門柱，讓出左手面大片空間，並且伸出雙手示意「讓」艾寧夏蘭特射大位，結果艾寧夏蘭特選擇射另一邊，奧拿拿捉錯路，「順利」被對手射入。

奧拿拿12碼大戰夏蘭特片段：https://x.com/i/status/1822433932400582971　

曼聯喺季前美國之旅熱身賽對阿仙奴，奧拿拿亦曾經用過同樣招數2次，法比奧韋拉同加比爾馬加希斯都成功射入，奧拿拿3次「讓你射」都成功做到。