麥巴比練波罰球63射0中　遭剝奪主射權

基利安麥巴比早前向皇馬報到，並參加操練，根據西班牙傳媒爆料，呢位法國前鋒喺射罰球操練期間，63次起腳，竟然0中目標，據悉教練安察洛堤有見及此，新一季安排洛迪高高斯接替掛靴嘅卻奧斯，負責處理罰球。

基利安麥巴比腳法細膩，入球數字高，西班牙傳媒及皇馬球迷都對佢寄予厚望，但「麥總」反高潮，操練期間63次主射罰球唔入之餘，連1次中目標嘅射門都冇，事後被輿論批評技術太粗糙。不過，亦有人力撐麥巴比，認為操練唔可以作準，加上佢剛剛復操，狀態不足所致。

盛傳安察洛堤已經決定將新一季處理罰球工作交畀洛迪高高斯，至於會唔會連12碼都交由呢位巴西國腳操刀，仍然有待商榷。皇馬將於8月15日凌晨歐超盃對阿特蘭大，麥巴比必須把握機會證明身價，省番靚招牌。