阿仙奴一招「屈機」　捧酋長盃振軍心

以英超冠軍為目標嘅阿仙奴，周日(11日)喺主場2比0擊敗法甲勁旅里昂，開咧前先捧酋長盃振奮士氣。阿仙奴今場佔盡優勢，不過2球入波都係靠角球「屈機」，佢哋上季已經係英超角球入波最多球隊，新球季似乎會繼續發揮呢項優勢。

阿仙奴今仗強陣出擊，主場聲勢下控制大局，9分鐘威廉沙列巴接應迪格蘭賴斯角球頂入，踢到27分鐘阿仙奴照辦煮碗，同樣係迪格蘭賴斯開角球，今次輪到另一中堅加比爾馬加希斯「飛將軍」迎頂入網。下半場布卡約沙卡曾頭槌頂中柱，阿仙奴最終贏2比0完場。

阿仙奴上季英超有16個入波來自角球，數字係英超之冠，領隊阿迪達賽後表示：「我哋要不斷改良，今場2個死球入波畀到球隊信心，亦令對手多一樣嘢要防範，球隊具備好多唔同嘅入波板斧，呢個係我樂於見到嘅情況。」