拜仁孖寶抵達卡靈頓基地　即將投曼聯

曼聯失落社區盾後，組軍工作火熱進行中，周一（12日）被影到兩名拜仁慕尼黑後衞馬沙拉奧及馬菲斯迪歷特抵達卡靈頓基地，準備接受體檢，然後加盟。

多間傳媒報道，兩位拜仁後衞前後腳抵達慕尼黑機場，馬沙拉奧先到，馬菲斯迪歷特跟住到達，據報兩人聯袂飛到曼聯，馬菲斯迪歷特更向記者直言：「馬沙拉奧等緊我。」後來守候在卡靈頓基地大門嘅傳媒影到兩人嘅七人車駛入。

據報馬菲斯迪歷特將與曼聯簽約5年+1年，轉會費總值5,000萬歐元(約4.3億港元)，周一剛好係佢25歲生日，拜仁官方發帖祝佢生日快樂，不過相信係佢離隊前最後一次為佢發生日祝賀帖。

至於馬沙拉奧加盟曼聯嘅合約同樣係5年+1年，轉會費總值2,000萬歐元(約1.7億港元)，加盟落實後，右閘雲比沙卡就會轉投韋斯咸，事實上雲比沙卡已經抵達韋斯咸接受體檢，轉會費1,500萬鎊(約1.5億港元)。