曼聯翻新奧脫福通道　落場前先贏氣勢

曼聯主場奧脫福球場被譽為「夢劇院」，不過日久失修下已經變得殘舊兼落後，新老闆拉特克利夫雖然計劃興建新球場，但亦不忘修整一下奧脫福，喺英超開鑼前就完成翻新球員通道，等球隊喺開波前營造出紅魔嘅氣勢！

奧脫福嘅球員通道向來簡陋，天花同牆身都係核突嘅支架，拉特克利夫覺得呢段球員賽前賽後嘅必經之路，應該展現出曼聯嘅歷史同氣勢，所以勒令進行翻新。工程喺英超開鑼前順利完成，新嘅球員通道兩邊牆壁油上紅黑色，有大大個魔鬼標誌同UNITED字眼，天花再有巨型曼聯隊徽同設計新潮嘅LED燈，仲有展示球會歷史同班主資料，令對手喺出場前先感受曼聯嘅強勢，新設計獲唔少球迷大讚。

據報曼聯計劃斥資20億鎊，興建一個可以容納10萬人嘅新球場選址喺正奧脫福球場隔籬，希望可以喺2030年落成，預計今個年底會有正式公布。