梅拿2射1傳　拜仁德國盃大炒乙組仔

周六(17日)凌晨德國盃第1圈賽事，拜仁慕尼黑即使只係作客德乙球隊烏爾姆，但仍然以強陣出擊，34歲老將湯馬士梅拿成為主角，射入2球及1次助攻，協助拜仁大勝4比0晉級。

拜仁射手哈利卡尼今場先做後備，湯馬士梅拿罕有擔任正前鋒，佢不負所托，開賽12分鐘就入波打開紀錄，僅過2分鐘，呢位德國老將再入1球。換邊之後，拜仁教練高柏尼陸續換入哈利卡尼、京士利高文、米高奧利斯等球員。

今夏以6,000萬歐元(約5.1億港元)轉會費由水晶宮來投嘅翼鋒米高奧利斯，立即展現身價，後備上陣僅2分鐘，就貢獻助攻，傳畀京士利高文射成3比0。

戰至補時，湯馬士梅拿傳中，哈利卡尼頂入，4蛋贈烏爾姆，拜仁連續29屆德國盃首圈贏波。