美斯落選阿根廷大軍　施蒙尼細仔趁機上位

阿根廷國家隊主帥史卡朗尼公布新一期大軍名單，備戰下月世界盃外圍賽，球王美斯因為有傷在身落選，多位鋒線小將獲得徵召，包括名宿施蒙尼嘅細仔朱利亞諾，呢位21歲「奧運腳」有望趁機爭上位。

美斯自從7月15日美洲國家盃決賽受傷之後，至今一直養傷，冇份入選阿根廷今次大軍名單，並唔令人意外。史卡朗尼趁機揀選多位年輕進攻球員，希望為球隊注入新血，包括馬體會前鋒朱利亞諾、拉素前鋒卡斯迪蘭奴斯、羅馬前鋒馬迪亞斯蘇利等。

當中以朱利亞諾最受注目，因為佢係馬體會教練施蒙尼嘅細仔，有份為阿根廷出戰今屆巴黎奧運，並射入1球，被指潛力更勝2位哥哥基奧雲尼施蒙尼、基安盧卡施蒙尼，難怪三兄弟只有朱利亞諾入選。

阿根廷鋒線上仲有拿達路馬天尼斯、祖利安艾華利斯、阿歷真度加拿祖等球星，相信美斯缺陣影響唔大。阿根廷將於9月6日早上世盃外主場對智利，5日之後作客哥倫比亞。