巴高拿3戰入4球　佢係下一位麥巴比？

周一(2日)凌晨法甲，巴黎聖日耳門(PSG)作客以3比1擊敗里爾，3戰全勝，22歲前鋒巴特利巴高拿今仗又入1球，聯賽開季3場都有波入，合共轟入4球，被捧為基利安麥巴比真正接班人。

PSG佔盡上風，創造唔少攻勢，踢到32分鐘，奧士文尼迪比利突破入禁區，被對手剷跌，球證判罰12碼，域天拿主射入網為PSG打開紀錄。僅過4分鐘，馬高阿辛斯奧作出美妙斜傳，巴特利巴高拿單刀冷靜射入，好有麥巴比影子，連續3場聯賽建功。

換邊之後，里爾憑中場伊頓施高華遠射入網追番1球，但補時階段，後備上陣嘅PSG前鋒高路梅安尼頂入成3比1，奠定勝局。

基利安麥巴比今夏離開PSG後，球隊攻力並冇減弱，好大程度上因為巴特利巴高拿狀態大勇，踢3場聯賽入4球，已追平佢上季踢25場聯賽總入球數字，可見呢位法國新星進步非常大。