尼馬體測肥佬　復出或推遲至明年1月

巴西球星尼馬上年10月膝部韌帶重傷，做手術後一直養傷至今，最近佢不斷喺社交網發放練習嘅相片同影片，盛傳即將重返球場。不過近日有理療師公開一段尼馬做體測片段，指呢位32歲老將表現未如理想，沙特傳媒指尼馬復出日期可能要延遲至明年1月。

希拉爾將為新球季提交名單，據報尼馬早前進行體測未如人意，爆料嘅理療師話：「尼馬喺跳躍練習入面，明顯缺乏穩定性同信心，尤其係膝頭，落地嗰陣出現脆弱嘅迹象。」尼馬上年10月踢世盃外期間受傷，11月做前十字韌帶同半月板手術，一直抖到依家。

據沙特傳媒報道，希拉爾預計尼馬要抖多2個月先可以復出，而且會先為佢安排個人練習，所以上半季唔會幫佢註冊，希望明年1月可以正式加入，到時再喺聯賽同亞冠精英盃淘汰賽註冊。