【官宣】迪比投哥連泰斯　朗奴高文又有嘢講

荷蘭球星迪比今夏同馬德里體育會約滿後，一直未有落班，周一(9日)終於宣布離開歐洲球壇，轉戰巴甲簽約哥連泰斯2年。早前極力反對貝雲積去沙特落班嘅荷蘭領隊朗奴高文，就對今次轉會「開綠燈」，唔排除會再召迪比入國家隊。

30歲嘅迪比一直係荷蘭主力，周一飛抵巴西同哥連泰斯簽約至2026年夏天，據報2年合約總值1,100萬歐元，當中900萬歐元會由哥連泰斯嘅贊助商承包，令佢成為全隊最高薪球員。

另一荷蘭國腳貝雲積早前轉戰沙特，被朗奴高文炮轟為錢棄前途，國家隊「永不錄用」；今次迪比去巴甲，朗奴高文亦有嘢講：「我反對貝雲積去沙特，但迪比唔同，巴甲嘅水平更高，所以我冇問題，迪比仍然有機會入選國家隊，前提係佢踢出自己嘅狀態同水平。」