蘇斯克查表明願意回巢　坦哈格驚未

曼聯今季成績仍然冇起色，不時傳出領隊坦哈格面臨被炒，前主帥蘇斯克查近日出席挪威商業論壇期間，表明如果紅魔鬼邀請佢回巢執教，佢一定會答應，隨時有可能取代坦哈格。

蘇斯克查被問到將來會唔會重返曼聯，佢話：「如果屋企(曼聯)開到聲，我一定會答應，但現時唔適合討論別人(坦哈格)嘅工作。」現年51歲嘅蘇斯克查同曼聯關係密切，球員時代曾經效力紅魔鬼11年，退役後做過預備組教練。

蘇斯克查2018年12月重返曼聯，接替摩連奴，執教曼聯，雖然曾經交出不俗成績，包括取得2021年歐霸盃亞軍，但無以為繼，2021年11月被炒。蘇B離開曼聯之後，一直未有再教波，莫非仲等緊紅魔鬼召喚？