40歲恩尼斯達預告掛靴　波衫8號打橫

西班牙中場名將「小白」恩尼斯達，在個人社交平台預告10月8日公布個人動向，西班牙傳媒預期佢會宣布掛靴，正式結束球員生涯。

小白最後一支效力球隊係阿聯酋嘅酋長FC，今年7月約滿後未有再落班，亦未有前赴美職國際邁阿密再同美斯並肩作戰，球員生涯由2002年開始至2024年，22年球會及國家隊共上陣1016場，射入106球及191次助攻，生涯最重要入球當然係2010年世界盃決賽加時下半場攻破荷蘭大門嘅奠勝球。

佢嘅掛靴預告片，有一名街頭塗鴉人士在牆上寫住「即將來臨」及「10月8日」，以及恩尼斯達背面肖像，波衫號碼係8號打橫，代表「永恆」嘅符號，之後寫住「歡迎來到我的未來」，據報佢會在加泰隆尼亞舉行活動，宣布掛靴。