般費打破沉默回應「兩連紅」：近5年最困難時刻

曼聯隊長般奴費南迪斯近2場比賽，分別於英超對熱刺，歐霸盃對波圖，都被球證出示紅牌趕出場，成為球隊失利「戰犯」，表現備受批評。呢位30歲葡萄牙國腳打破沉默作出回應，形容自己陷入近5年最困難時刻。

般奴費南迪斯透過社交網發表「千字文」話：「對於球隊同我而言，絕對係最困難時期之一，加盟曼聯近5年，經歷高低起伏，有好有壞，我嘅球員生涯經常面對挑戰同逆境，但從未考慮逃避責任，我知道咁講好似係陳腔濫調，曼聯球迷或者會覺得厭倦，但呢個時期，冇人會比我感到更加失望，要感謝所有仍然支持同信任我嘅人。」

般奴費南迪斯對熱刺一役，所領取嘅紅牌，早前經過上訴後，獲英足總判勝訴，成功打甩，唔需要停賽，可以出戰周日(6日)晚英超大戰作客對阿士東維拉，算係不幸之中嘅大幸。