香港隊　韋斯活首度正式領軍鬥列支敦士登

收看直播，請按直播ICON，或按下面鏈結：

https://tv.on.cc/sportlive/　

香港男子足球代表隊周五（11日）凌晨出戰1場國際友誼賽，作客萊茵公園球場與列支敦士登交鋒。雖然一眾球員經歷舟車勞頓，體力難免有所影響，但今仗為新帥韋斯活首場正式領軍的賽事，全隊定必全力而赴，大踢爭氣波！（on.cc東網周五凌晨1時30分免費直播）

港隊周一（7日）凌晨出發，經超過10小時的長途機後，終於到達奧地利，並到位於鄰近列支敦士登邊境的奧地利西部城市多恩比恩（Dornbirn）備戰，主教練韋斯活形容當地氣候理想，適應不成問題。談到今場對手，韋斯活指雖然對手世界排名為203位，較港足的157位低，但仍不能掉以輕心：「列支敦士登排名比較低，係因為佢哋之前嘅比賽好惡踢，但當上個月喺歐國聯對番水準相近嘅對手，表現好好多，又擅長用高空轟炸製造威脅，完全唔易應付。」

鐘樂安（Leon）就表示，過去未曾到過奧地利及列支敦士登比賽，形容今次為「全新體驗」，又提到經過操練後，對韋斯活的戰術有更深入了解：「同香港比，呢度嘅天氣涼好多，又冇咁潮濕，好適合踢波；主教練（韋斯活）喺操練畀咗好多新指示我哋，大家都要時間去適應，但相信練咗幾課波，大家已經慢慢掌握到佢嘅諗法。」

韋斯活亦與顏卓彬出席賽前記招，其中韋斯活表示，即使上一任主帥莊恩安達臣收穫不少佳績，但他強調只會做好自己，盡力為港足取得成功。談到今場目標，韋斯活期望球員適應其戰術理念後，有所發揮，長遠爭取晉級大賽決賽周：「我哋梗係想贏波啦，但對一場友誼賽嚟講，表現比結果重要，而且球員要啲時間適應新戰術，希望大家趁呢段時間操熟啲，爭取打入『東亞盃』同『亞洲盃』決賽周。」

至於「彬仔」指韋斯活的戰術理念，更講究保持控球權：「以前我哋會打多啲逼搶，一攞到波就全力搶攻，但韋斯活想我哋盡量控球在腳，好過盲目向前攻。」被問到首次代表「大港腳」與歐洲球隊交手，「彬仔」對此感覺新鮮，盼能踢出好表現：「港隊應該未試過飛去歐洲踢友誼賽，所以大家對呢場波好期待，希望可以踢出應有水準，畀一班特登嚟撐場，或者通宵睇波嘅球迷，睇到我哋努力嘅成果。」

另一邊廂，是役為列支敦士登2024年第1個主場賽事，今年內之前6場國際賽戰績為3和3負，包括9月在歐國聯D1組，分別以0比1不敵聖馬力諾，以及2比2賽和直布羅陀，走勢未如理想。陣容方面，現時效力瑞士第2級聯賽球隊華杜茲、曾效力FC多倫多等美職球隊的希斯拿（Nicolas Hasler），為現役列支敦士登國家隊入球最多的球員，至於中場布查（Marcel Buchel）曾投效祖雲達斯及安玻里等隊伍，曾於意甲上陣超過60場。

【港隊預計正選陣容】

門將：1.葉鴻輝

後衞：21.茹子楠 3.周緣德 4.鐘樂安 23.孫銘謙

中場：14.余在言 8.顏卓彬 16.陳肇鈞

前鋒：11.祖連奴 9.安永佳 17.陳晉一