阿迷最期待畫面　奧迪加特即將復出

阿仙奴季初傷兵滿營，不過情況近期開始好轉，隊長馬田奧迪加特近日公開復操影片，顯示佢嘅左腳足踝傷患已經接近痊愈，有望趕及月底開始嘅連場硬仗。

奧迪加特喺上月國際賽代表挪威嗰陣，被踢傷左腳足踝，據報傷及韌帶一度被傳要長抖。不過阿仙奴日前宣布奧迪加特開始復操，足踝亦唔需要任何護具，做跑步機同重力訓練都冇任何問題。

25歲嘅奧迪加特上周表示：「傷勢有明顯好轉，一日比一日好，令我更有動力，國際賽期我有更多時間去做康復治療，希望唔使幾耐可以重返球場。」

阿仙奴喺奧迪加特受傷後依然維持良好表現，7場比賽拎到5勝2和成績，「兵工廠」今個月底開始，連續3場聯賽對利物浦、紐卡素同車路士，奧迪加特有望復出領軍。