東網電視
更多新聞短片
安達夫(左)連續2場歐國聯入波。(Getty Images)
周六(12日)凌晨歐國聯A3組，德國憑安達夫梅開二度，作客以2比1擊敗波斯尼亞，呢位史特加前鋒連續2場歐國聯入波，共合轟入3球及1次助攻，成為「日耳曼兵團」高效殺手。
德國今場控制大局，上半場30分鐘，科利安華迪斯回傳，安達夫第一時間起腳射入，僅過6分鐘，米圖斯達特左路傳中，安達夫近門剷入成2比0。換邊之後，波斯尼亞靠38歲老將迪斯高頂入角球追至1比2，但未能收復失地，今屆歐國聯3戰只有1和2負排小組包尾。
至於德國3戰取得2勝1和排榜首，安達夫繼上輪射入荷蘭1球及1次助攻後，今場再有2球進帳，演出非常搶鏡。呢位28歲射手大器晚成，上季德甲表現一鳴驚人，上陣30場入18球，今年3月首次晉身德國大國腳，5次披甲已入3球，至於今季德甲踢6場入4球，效率極高。
值得一提，安達夫原本可以選擇代表土耳其，但佢作出拒絕，堅持要代表德國，現時總算守得雲開。
