東網電視
更多新聞短片
尼高路辛尼奧路今季被加拉塔沙雷外借去阿特蘭大。(Getty Images)
意大利中場羅倫素柏歷堅尼上場歐國聯對比利時，從後飛剷對手，被球證出示紅牌趕出場，需要停賽，無緣周二(15日)凌晨對以色列，領隊史巴列堤宣布補選尼高路辛尼奧路，意味呢翼鋒、辛度東拿利、尼高路法基奧利，3位上年捲入違規賭波事件嘅球員，將雲集國家隊。
尼高路辛尼奧路、辛度東拿利、尼高路法基奧利上年10月被踢爆違規賭波，東拿利被罰停賽10個月，今年8月底先至復出，法基奧利亦坐咗7個月「波監」。辛尼奧路避過一劫，冇受到停賽處罰，但表現低沉，自3月之後，再冇入選國家隊，反觀法基奧利、東拿利復出後，獲主帥史巴列堤器重，東拿利更穩坐正選。
辛尼奧路今季被加拉塔沙雷外借去阿特蘭大，各項賽事上陣5場仍未入波，僅貢獻1次助攻，意大利傳媒認為佢唔值得獲補選，並對於史巴列堤棄用今屆歐國盃有出色表現嘅薩卡尼，感到費解。至於辛尼奧路能否趁今場歐國聯證明實力，反擊批評聲音，大家拭目以待。
