法國險勝比利時　創一項近16年羞恥紀錄

周二(15日)凌晨歐國聯A2組，法國憑高路梅安尼包辦2個入波，作客以2比1擊敗比利時，獲得3連勝，但呢支傳統勁旅同時暴露一大弱點，已連續5場作客比賽有失波，創下近16年以來最長連續作客失波紀錄，領隊迪甘斯真係要諗計堵塞防線漏洞。

雙方上月首循環交鋒，法國主場贏2比0，今次碰頭，比利時一度佔上風，但卻連番失機，包括23分鐘奧賓達殺入禁區，被威廉沙列巴踢跌，球證判12碼，但泰利文斯射失，其後謝利美杜古勁射僅貼柱出界。

戰至35分鐘輪到法國獲得12碼，高路梅安尼主射入網，上半場補時，奧賓達近門頂入為比利時扳平。

換邊之後，高路梅安尼再建一功，法國又領先，但中場曹亞文尼76分鐘被趕出場，令球隊陷於苦戰，最終勉強保住勝果，落後榜首意大利1分。法國將於下月最後一輪作客意大利，球隊今場又失1球，繼2007年11月至2008年10月後，再次連續5場作客失波，屆時造訪意大利，後防存在重大隱憂。