曼聯名宿訪韓　跟住「星仔」去Shopping

曼聯上星期將「宣傳大使」費格遜炒魷，不過佢哋仍然有唔少舊將喺世界各地宣傳，近日里奧費迪南、尼曼查維迪、雲達沙、貝碧托夫就現身南韓，跟住「導遊」朴智星去Shopping，勾起曼聯球迷美好回憶。

5位曼聯名宿都係08/09球季英超冠軍功臣，今次訪韓係應足球遊戲商邀請去踢表演賽，眾球星齊齊換上傳統韓服，跟住朴智星去遊覽同購物，據報佢哋參觀過狎鷗亭、首爾塔同光化門等熱門景點，沿途都有唔少球迷要求合照。

里奧費迪南率先喺IG貼出佢哋遊韓相片，更自爆獲朴智星帶去買衫，而且「星仔」仲會幫所有人埋單，認真豪氣！報道指佢哋參加嘅表演賽，會係「攻擊隊」對「防守隊」，其他出席球星名單包括亨利、奧雲、卡卡、李華度、費高、夏薩特同迪比亞路等等。