東網電視
更多新聞短片
祖漢杜蘭(左)今季為維拉上陣12場入7球。(Getty Images)
今屆歐聯改制之後，阿士東維拉成為最令人驚喜嘅異軍，呢支英超球隊周三(23日)凌晨，主場以2比0擊敗博洛尼亞，3戰全勝，力壓各大豪門，暫時排榜首。
雙方今場互有攻守，阿士東維拉勝在把握力比較強，踢到55分鐘，中場約翰麥甘尼開出罰球，門前大漏，彈地入網打開紀錄。9分鐘之後，摩根羅渣士左路傳中，祖漢杜蘭射成2比0，呢位20歲哥倫比亞國腳今季為維拉12場上陣入7球，效率非常高。
根據西班牙《阿斯報》爆料，阿仙奴、巴塞隆拿、車路士等大球會都有意收購祖漢杜蘭，維拉要求7,500萬鎊(約7.5億港元)以上轉會費。
阿士東維拉相隔41年後再戰歐聯，踢出超水準，繼首2場分別大勝年青人3比0，以及爆冷贏拜仁慕尼黑1比0之後，今場贈博洛尼亞兩蛋，3戰全勝兼冇失波，表現可以話係無懈可擊。
