羅馬又炒教練　林柏特成新帥候選人

意甲名牌羅馬今季成績低迷，周日(10日)聯賽主場2比3不敵博洛尼亞後，球會官方宣布將教練祖歷炒魷，今年內第3次換帥，有消息指前車路士領隊林柏特都係新帥候選人之一。

羅馬輸畀博洛尼亞後，近5場聯賽4次輸波，依家只排意甲第12位，上任唔夠2個月、只教過12場波嘅祖歷即被辭退。羅馬今年2月炒摩連奴魷魚、9月份又炒迪羅斯，兩次換帥都引嚟球迷抗議，估唔到祖歷捱唔到2個月又「落鑊」。

據《天空體育》報道，羅馬依家物色新帥人選，前多蒙特教練泰錫同前車路士領隊林柏特都係熱門人選，而早前離開沙特阿拉伯嘅文仙尼亦喺名單之上。意大利傳媒指羅馬高層上星期曾喺倫敦進行商業會議，唔排除曾經同林柏特進行接觸。