士砵亭新教練登場　佢跟過艾摩廉踢波

葡超勁旅士砵亭主帥魯賓艾摩廉被曼聯撬走後，周一(11日)宣布提拔B隊「揸弗人」祖奧彭利拿接教鞭，呢位前葡萄牙國腳雖然年紀大過艾摩廉少少，但掛靴前都喺艾摩廉麾下踢過，相信都學到唔少嘢。

士砵亭成個教練團過晒曼聯，球會就決定內部提拔，40歲嘅祖奧彭利拿由B隊升上一隊，佢球員時代踢右閘，效力過華倫西亞、漢諾威等球會，仲3度為士砵亭效力，包括20/21球季喺艾摩廉執教下比賽，球季完咗佢就掛靴並轉任教練，由士砵亭U23教到B隊再到一隊，平步青雲。

祖奧彭利拿正式「坐正」後表示：「我好榮幸，好多謝球會對我嘅信任，我亦要多謝艾摩廉對葡萄牙足球、對士砵亭嘅貢獻，佢留低嘅傳奇故事唔單止係成就、勝利同紀錄，亦係為士砵亭帶來嘅團結，我知道自己責任重大，所以我更有動力去為球會爭取成功。」